Англискиот јазик припаѓа на групата западногермански јазици, кој почетно се зборувал во раната средновековна Англија  како мајчин јазик на најголемиот број на луѓе во Австралија, Ирска, Канада, Комонвелтските Кариби, Нов Зеланд, Обединетото Кралство и САД (групно наречени Англосфера). Во голема мера се користи како втор јазик и како службен јазик низ светот, особено во земјите како Индија, Пакистан и Шри Ланка и во многу меѓународни организации.

Современиот англиски јазик може да се рече дека е лингва франка. Името го носи по името на Англите, едно од германските племиња кое мигрирало во областа на Велика Британија, која дури подоцна го доби своето име Англија. Англискиот јазик е тесно поврзан со фризискиот и долно саксонскиот, а неговиот речник е под големо влијание на норвешкиот (северногермански јазик) латинскиот и францускиот јазик.

Англискиот јазик се развива во текот на повеќе од 1.400 години. Најраните форми на англиски јазик, група на западно-германски дијалекти кои се донесени во Велика Британија од англо-саксонските доселеници во V век, колективно се нарекува староанглиски јазик.  Староанглискиот грубо наликува на некои крајбрежни дијалекти во денешна северозападна Германија и Холандија (т.е. Фризија).

Средноанглискиот јазик започна кон крајот на XI век со норманското освојување на Англија. Ова бил период во кој англискиот јазик бил под влијание на францускиот јазик. Раносовремениот англиски јазик започнал кон крајот на 15 век со воведувањето на печатницата во Лондон, печатењето на Библијата за кралот Џејмс и со „Great Vowel Shift“. „The Great Vowel Shift“ е серија на промени во изговорот на англискиот јазик, што се случила првенствено помеѓу 1400 и 1700 година, почнувајќи во јужна Англија со големо влијание врз сите денешни дијалекти на англискиот јазик.

Современиот англиски јазик се шири низ целиот свет од 17 век, преку светското влијание на Британската империја и САД. Преку сите типови печатени и електронски медиуми од овие земји, англискиот јазик стана водечки јазик на меѓународниот дискурс и „lingua franca“ во многу региони и професионални активности.

Англискиот е најраспространет јазик по број на корисници  и трет најзастапен мајчин јазик во светот, по стандарден кинески и шпански. Тој е најраспространетиот втор јазик и е или официјален јазик или еден од официјалните јазици во скоро 60 суверени држави. Има повеќе луѓе кои го научиле како втор јазик отколку луѓе на кои им е мајчин јазик. Се проценува дека има над 2 милијарди говорители на англиски јазик. Англискиот е мајчин јазик во САД, Велика Британија, Канада, Австралија, Нов Зеланд и Република Ирска и јазик кој се зборува во некои области на Карибите, Африка и Јужна Азија. Според  меѓународниот  договор англискиот е службен јазик на воздушните и поморските комуникации, како и еден од службените јазици на Европската Унија, Обединетите Нации и речиси сите меѓународни спортски организации, меѓу кои и меѓународниот олимписки комитет.

Англискиот е најизучуван како странски јазик во Европската Унија (од 89% од учениците), по кој следат францускиот (32%), германскиот (18%) и шпанскиот (8%). Голем дел од населението вели дека може да разговара на англиски јазик во: Холандија (87%), Шведска (85%), Данска (83%), Луксембург (66%), Финска (60%), Словенија (56%), Австрија (53%), Белгија (52%) и Германија (51%).Норвешка и Исланд исто така имаат големо мнозинство на способни говорители на англиски јазик​